-उपमुख्यमंत्र्यांच्या उपस्थितीत बैठक सिडको अधिकाऱ्यांकडून तातडीच्या निर्णयाची ग्वाही

एनसीपी (शरद पवार गट) ची ठाम भूमिका – माथाडी कामगारांसाठी वाढीव कोटा तात्काळ मंजूर करा

एपीएमसी न्यूज़ नेटवर्क : 
नवी मुंबई येथील एपीएमसी ट्रक टर्मिनल परिसरात सिडकोकडून बांधण्यात आलेल्या घरांमध्ये माथाडी कामगारांसाठी स्वतंत्र आणि वाढीव कोटा मंजूर करावा, अशी ठोस मागणी आज झालेल्या महत्त्वपूर्ण बैठकीत करण्यात आली. या मागणीचे नेतृत्व राष्ट्रवादी काँग्रेस (शरद पवार गट) चे प्रदेशाध्यक्ष व ज्येष्ठ माथाडी नेते शशिकांत शिंदे यांनी केले.

आज सिडको विषयक ही उच्चस्तरीय बैठक उपमुख्यमंत्री एकनाथ शिंदे, परिवहन मंत्री प्रताप सरनाईक, आमदार विक्रांत पाटील, सिडकोचे व्यवस्थापकीय संचालक, वरिष्ठ अधिकारी व कर्मचारी यांच्या उपस्थितीत पार पडली.

बैठकीत ट्रक टर्मिनल येथील सिडको घरांशी संबंधित तातडीच्या मुद्द्यांवर सविस्तर चर्चा झाली. यावेळी अधिकारी वर्गाने गरिबांसाठी असलेल्या या घरांबाबत लवकरात लवकर योग्य निर्णय घेण्याचे आश्वासन दिले. उपमुख्यमंत्री एकनाथ शिंदे यांनीही या विषयावर संवेदनशील भूमिका घेत माथाडी बांधवांच्या निवासाला प्राधान्य देणारा सकारात्मक निर्णय लवकरच घेतला जाईल, असे स्पष्ट केले.

शशिकांत शिंदे यांनी बैठकीत सांगितले की —
* माथाडी कामगार हा शहराच्या आर्थिक चक्राचा कणा असून,
* एपीएमसी ट्रक टर्मिनलच्या कामकाजात त्यांचा मोठा वाटा आहे,
* त्यामुळे त्यांच्यासाठी सिडको घरांमध्ये स्वतंत्र आणि वाढीव कोटा अपरिहार्य आहे.

सिडको घरांचे वाटप करताना
* माथाडी बांधवांना स्वतंत्र व वाढीव कोटा,
* गरजूंना प्राधान्य,
* संपूर्ण प्रक्रियेत पारदर्शकता,

या मुद्द्यांवर अधिकाऱ्यांनी सहकार्याची ग्वाही दिली.

बैठकीचा निष्कर्ष असा की, ट्रक टर्मिनल परिसरातील सिडको घरे गरिबांच्या हिताचा विचार करून वाटप केली जाणार असून माथाडी समाजाच्या निवासी हक्कासाठी आवश्यक निर्णय लवकरच अपेक्षित आहेत.