कांदा-बटाटा मार्केटच्या गेटवरील व्हिडिओनंतर दोघांवर कारवाई

सचिव राजाराम धोंडकर यांच्या कारवाईने अधिकारी-कर्मचाऱ्यांमध्ये खळबळ

नवी मुंबई : राष्ट्रीय महत्त्वाचा बाजार असलेल्या मुंबई एपीएमसीमध्ये सचिव राजाराम धोंडकर रुजू झाल्यानंतर प्रशासनाने शिस्तीला प्राधान्य देत कारवाईचा बडगा उगारण्यास सुरुवात केल्याचे चित्र आहे. कांदा-बटाटा मार्केटच्या जावक गेटवर पैसे स्वीकारल्याचा व्हिडिओ सोशल मीडियावर व्हायरल झाल्यानंतर बाजार समिती आस्थापनेवरील एका कर्मचाऱ्यावर निलंबनाची कारवाई करण्यात आली आहे. तसेच रिक्षाचालकाकडून पैसे स्वीकारल्याच्या प्रकरणात एका सुरक्षा कर्मचाऱ्यावरही कारवाई करण्यात आली आहे. या कारवाईमुळे एपीएमसीतील अधिकारी, कर्मचारी आणि सुरक्षा यंत्रणेत खळबळ उडाली आहे.

सोशल मीडियावर व्हायरल झालेल्या व्हिडिओमध्ये कांदा-बटाटा मार्केटच्या जावक गेटवर पैसे स्वीकारल्याचे दृश्य दिसून आल्याचे समोर आले. या व्हिडिओची दखल घेत प्रशासनाने चौकशी करून संबंधित कर्मचाऱ्यावर निलंबनाची कारवाई केली. याचबरोबर रिक्षाचालकाकडून पैसे स्वीकारल्याच्या प्रकरणात सुरक्षा कर्मचाऱ्यावरही कारवाई करण्यात आली आहे.

‘मेमो’च्या पलीकडे कारवाईचा संदेश

मुंबई एपीएमसीचे अध्यक्षपद राज्याचे पणन मंत्री जयकुमार रावल यांच्याकडे आहे. नव्या प्रशासनाकडून बाजार समितीचा कारभार अधिक शिस्तबद्ध करण्यावर भर दिला जात आहे. यापूर्वी चुकीच्या कामांच्या प्रकरणांमध्ये तत्कालीन सचिव नोटीस किंवा मेमो बजावून कारवाईच्या नावाने दिखावा करत होते. मात्र, आता गंभीर स्वरूपाच्या प्रकरणांमध्ये थेट निलंबनासारखी कठोर प्रशासकीय कारवाई केली जात असल्याने अधिकारी-कर्मचाऱ्यांमध्ये स्पष्ट संदेश गेला आहे.

‘चुकीचे काम केले तर कारवाई अटळ’

बाजार समितीच्या आस्थापनेवर काम करणाऱ्या अधिकारी, कर्मचारी तसेच सुरक्षा कर्मचाऱ्यांनी नियमांचे पालन करून काम करावे, असा स्पष्ट संदेश या कारवाईतून प्रशासनाकडून देण्यात आला आहे. कोणत्याही कर्मचाऱ्याने गैरप्रकार केल्यास केवळ नोटीस किंवा मेमोपुरती कारवाई मर्यादित न राहता नियमानुसार कठोर कारवाई होऊ शकते, अशी चर्चा आता एपीएमसीच्या आवारात रंगली आहे.

‘तोंड पाहून कारवाई’ला आळा बसणार?

नवीन सचिवांच्या कारवाईमुळे एपीएमसीतील शिस्तीच्या मुद्द्यावरही चर्चा सुरू झाली आहे. कारवाई करताना व्यक्ती कोण आहे, यापेक्षा संबंधिताने केलेल्या कृत्याला महत्त्व दिले जाईल का, याकडे आता अधिकारी-कर्मचाऱ्यांचे लक्ष लागले आहे. प्रशासनाने पारदर्शकपणे आणि नियमांनुसार कारवाई केल्यास बाजार समितीतील कामकाजावर त्याचा थेट परिणाम होण्याची शक्यता आहे.

पणन मंत्र्यांच्या आदेशांचा धसका

राष्ट्रीय महत्त्वाचा बाजार म्हणून एपीएमसीच्या कामकाजात शिस्त, पारदर्शकता आणि उत्तरदायित्व आणण्याच्या पार्श्वभूमीवर पणन मंत्री तथा बाजार समितीचे अध्यक्ष जयकुमार रावल यांनी प्रशासनाला दिलेल्या निर्देशांची अंमलबजावणी सुरू असल्याचा संदेश या कारवाईतून जात आहे. त्यामुळे बाजार समितीच्या आस्थापनेवर कार्यरत असलेल्या अधिकारी, कर्मचारी आणि सुरक्षा कर्मचाऱ्यांनी अधिक सतर्क राहून नियमांनुसार काम करण्याची गरज निर्माण झाली आहे.

एकंदरीत, एपीएमसीमध्ये आता ‘मेमो देऊन प्रकरण शांत’ करण्याऐवजी गैरप्रकार आढळल्यास थेट कारवाईचा मार्ग स्वीकारला जात असल्याचे या दोन प्रकरणांमधून दिसून येत आहे. त्यामुळे बाजार समितीतील ‘शिस्तीचा नवा अध्याय’ सुरू झाल्याची चर्चा अधिकारी-कर्मचाऱ्यांमध्ये आहे.