एपीएमसी न्यूज़ नेटवर्क :राज्यात उन्हाळ्याची तीव्रता वेळेआधीच वाढताना दिसत आहे. मार्च महिन्याच्या सुरुवातीलाच तापमानाने 35 अंशांचा टप्पा ओलांडला असून आता हवामान विभागाने पुढील दोन दिवस राज्यातील 18 जिल्ह्यांमध्ये उष्णतेच्या लाटेचा (Maharashtra Heat Wave) इशारा दिला आहे.

कमाल तापमान 38 ते 40 अंश सेल्सिअस दरम्यान राहण्याची शक्यता असल्याने नागरिकांनी खबरदारी घ्यावी, असे आवाहन हवामान विभागाने केले आहे.

कोणत्या जिल्ह्यांना इशारा?

कोकण व मुंबई परिसर :
पालघर, ठाणे, मुंबई

उत्तर महाराष्ट्र :
धुळे, नंदुरबार, जळगाव, नाशिक

पश्चिम महाराष्ट्र :
अहिल्यानगर

मराठवाडा :
छत्रपती संभाजीनगर, जालना, परभणी, बीड, हिंगोली, लातूर

विदर्भ :
अकोला, अमरावती, वर्धा

अकोला–अमरावतीत 18 मार्चपर्यंत उष्णतेची लाट

राज्यातील बहुतांश भागात ही उष्णतेची लाट बुधवारपर्यंत सक्रिय राहण्याची शक्यता आहे. मात्र विदर्भातील अकोला आणि अमरावती या दोन जिल्ह्यांमध्ये ही परिस्थिती 18 मार्चपर्यंत कायम राहू शकते.

या भागात तापमान सरासरीपेक्षा 4 ते 5 अंशांनी अधिक राहण्याची शक्यता हवामान विभागाने वर्तवली आहे.

उष्णतेपासून बचावासाठी घ्या ही काळजी
• दिवसभरात पुरेसे पाणी प्या, शरीरातील पाण्याचे प्रमाण कमी होऊ देऊ नका.
• दुपारी 12 ते 3 या वेळेत शक्यतो कडक उन्हात बाहेर जाणे टाळा.
• सुती आणि सैल कपडे वापरा.
• बाहेर जाताना टोपी, छत्री किंवा गॉगल्सचा वापर करा.
• लहान मुले आणि ज्येष्ठ नागरिकांनी विशेष काळजी घ्यावी, कारण त्यांना उष्माघाताचा धोका जास्त असतो.

यंदाचा उन्हाळा अधिक तीव्र?

उष्ण व दमट वाऱ्यांचा प्रवाह वाढल्याने आर्द्रतेत वाढ झाली आहे. त्यामुळे तापमानात लक्षणीय वाढ नोंदवली जात आहे. मार्चच्या दुसऱ्या आठवड्यातच उष्णतेची लाट जाणवत असल्याने यंदाचा उन्हाळा अधिक तीव्र राहण्याची शक्यता हवामान तज्ज्ञांनी व्यक्त केली आहे.